Metero kare 10 zagombye gufungirwamo umucriminnel umwe nka Kagame, zifungirwamo abahutu igihumbi.None ngo abana b’aba bantu nibahaguruke bafashe Kagame urugamba!!! Uru rugamba ntazarutsinda…
Abigiriwemo inama na bamwe mu bihayimana bazonzwe n’irondakoko bakarizamukana no kuri za litari, Kagame aherutse gutangaza abantu ubwo yavugaga mu ijambo rye bwa mbere ku kibazo cy’amoko mu Rwanda nyuma y’imyaka makumyabiri ya politiki ye kujijisha yahamyaga ko nta moko abaho mu Rwanda! Igitangaje aha si uko Kagame yavuga bwa mbere icyo atekereza ku moko y’abahutu n’abatutsi [kubera ko n'ubwo yahakanaga amoko ariko nta wari uyobewe ko ari inzobere mu by'irondakoko], ahubwo igitangaje ni igihe n’aho yahisemo gutangariza ibyiyumviro bye ku mibanire y’abahutu n’abatutsi mu Rwanda, aho yagarutse ku ngingo y’uko abahutu bagomba byanze bikunze gusaba imbabazi abatutsi. Ikindi gitangaje biruseho n’uburyo Kagame yahisemo gutangariza ibyiyumviro bye ku moko mu Rwanda mu nama y’urubyiruko yatumiwe bwangu bwangu, nyuma yo gukocorana kwe na Prezida Kikwete wa Tanzaniya. Uretse ibinyoma bya Semuhanuka nk’uko abisanganywe Kagame yahisemo guherekesha imitekerereze ye ku kibazo cy’amoko mu Rwanda [Entre autre kubeshya ngo mushiki we aho yigaga yahoraga akururwa amazuru n'abashakaga kumenya niba mu izuru ry'umututsi habamo igufa!!!], urasanga hari impamvu ikomeye yatumye Kagame akura agahu ku nnyo, bityo akerura ku mugaragaro ivangura ry’amoko ryamusaritse! Kuki rero yahisemo urubyiruko rudafite aho ruhuriye n’ibyaranze amateka y’igihugu, akaba arirwo atangariza ko rufite inshingano yo gusaba imbabazi mu mwanya w’abahutu!?
Uretse abanyapolitiki mpomoka b’abahutu barangwa muri iki gihe muri FPR [ku mpamvu zijyanye n'inda nk'uko byagarutsweho kenshi muri iki gihe], kimwe n’abihayimana bakurikira buhwishi (naifs) politiki ya FPR, Kagame wenyine niwe uzi mpamvu yahisemo gutera ubwoba urubyiruko rw’abahutu muri iyi minsi, arushora mu gusaba imbabazi « z’ibyakozwe » n’abakurambere babo. Nk’uko ibimenyetso byose bibigaragaza, Kagame ari gutegura izindi ntambara z’urudaca mu karere, bityo akaba nta bundi buryo asigaranye bwo kubona abarwanyi bahagije kandi bumva icyo barwanira, uretse kurwariza mu rubyiruko rw’abahutu. Kuba yaratangarije imbere y’urwo rubyiruko ko yitegura gukubita Prezida wa Tanzaniya ariwe Kikwete, ni ikimenyetso ko Kagame akeneye urubyiruko ashora ku rugamba ku bwinshi, kuko aramutse ashakishirije mu bavugwa ko bamushyigikiye by’umwihariko [abatutsi], hari impamvu nyinshi zerekana ko izi ntambara za Kagame atazazishobora. Ni bite rero, gushaka abarwanyi mu bahutu no gusaba imbabazi kwabo birahurira he n’urugamba rushya?
Iyo usesenguye amateka ya vuba, usanga intambara za Kagame na FPR mu karere zigenda zigana iherezo, kandi ikibazo nyamukuru aha nta kindi ni icyo kubura abarwanyi. Nk’uko bizwi, intambara n’ubwo zitegurwa n’ibihararumbo bisheshe akanguhe, ariko abazirwana mu by’ukuri ni urubyiruko, ni narwo ruzitakarizamo ubuzima ku buryo bukomeye. FPR itera intambara mu 1990 yifashishije urubyiruko rwabarizwaga mu makambi y’impunzi z’abanyarwanda, yitabaza kandi urubyiruko rwoherezwaga n’ababyeyi [aha byumvukane abatutsi] ruvuye mu Rwanda. Nyuma yo gutsinda urugamba mu 1994, abari basigaye mu rubyiruko rw’inkotanyi bigaruriye igihugu, baragisahura, barica barakiza, barubaka, bararya barahaga ubundi barabyara! Abahoze ari urubyiruko rwa FPR ubu barangije kubyimba imidigi, abo sibo bazajya ku rugamba Kagame ariho ategura. Ikindi kandi kuba baramenye intambara n’ibibi byazo, bakaba barabyaye abana bamaze kuba abasore n’inkumi, birumvikana ko batagikeneye kwihekura. Ni hehe rero hazaturuka abarwanyi bashya mu rubyiruko mu ntambara Kagame ategura zo guhangana n’ibihugu by’ibituranyi? Ntahandi hasigaye uretse mu rubyiruko rw’abahutu, aba bakaba bagomba kumvishwa impamvu bakoherezwa ku rugamba rwa FPR, aribyo bisobanura igikorwa cyo gusaba imbabazi bariho bahatirwa na Kagame!
Reka rero twibaze! Kagame akeneye nibyo urubyiruko rw’abahutu ngo rumufashe mu ntambara ateganya. Ariko se ibyo FPR yakoreye ababyeyi b’urwo rubyiruko muri iyi myaka makumyabiri ishize, bizatuma koko urwo rubyiriuko rugira umutima wo kumurwanirira, kabone n’aho yaruminjiramo ikinyoma kijyanye n’ibyo ababyeyi b’urwo rubyiruko baba barakoze mu myaka yashize? Nk’uko bigaragara, Kagame afashe ubutegetsi nta kindi yihatiye uretse gupyinagaza abahutu mu buryo bushobotse bwose, ibyo bikaba byarateye icyiyumviro ko ibyagiye bivugwa mu mateka bijyanye n’ingoma ntutsi byaba bifite ishingiro! Ibyo aribyo byose FPR yagaragarije n’abashidikanyaga ko ibyagiye bivugwa mu mateka bijyanye n’imitegekere ya gitutsi byaba bihuye n’ukuri. Nawe se, ntibyumvikana kubona imyaka makumyabiri ishira abantu barenganywa, imyaka makumyabiri igashira abantu batoratorwa mu kivunge bagashyirwa mu munyururu nta kundi kuvangura abarangwaho icyaha n’abere, ibyo FPR ikabikora kandi yifashishije cyane cyane bamwe batutsi. Iki kibazo cy’akarengane kamaze imyaka nicyo gituma n’abageragezaga gucira akari urutega abatutsi batarangwaho inabi bashobora kugera aho gushyira mu gatebo kamwe abatutsi bose, aho bagira bati ingomba ntutsi zirangwa buri gihe n’ubugome butagira urugero!
Muri rusange, uyu mugambi wa Kagame wo gushaka gushora urubyiruko rw’abahutu mu ntambara ze yitwaje kubashyiraho iterabwoba ry’ibyaha ngo byaba byarakozwe mu zina ryabo uzafata dutangare! Ibi ni nabyo bidutera kwibaza ubundi uwagombye gusaba undi imbabazi mu Rwanda mu izina ry’amoko uwo ariwe mu by’ukuri! Byonyine kubera ingoma y’agahotoro imaze imyaka makumyabiri, niba koko imbabazi zigomba gusabwa mu zina ry’amoko, abatutsi nibo bagombye gupfukama bagasaba imbabazi abahutu, kuko mbere y’uko FPR izana ishyano mu gihugu, ibyakomeje kukibaho kugeza iki gihe ntibyari kuzigera birotwa no mu nzozi. Kagame rero nashakishirize ahandi. Niba ashaka abamushyigikira mu ntambara, nabanze abohore ingoyi z’akarengane, afungure abarengana, hanyuma abone ubusobanura impamvu u Rwanda rugomba kurwana na Tanzaniya, Kongo n’abandi. Izo mpamvu nizimara kumvikana, kandi biboneka ko nta karengane kakirangwa mu Rwanda, abanyarwanda bazabona ubumufasha guhamagarira urubyiruko kurwana. Nibitaba ibyo, kandi ibi ntibisaba ubuhanuzi budasanzwe, uru rubyiruko Kagame ashaka gushora mu ntambara kandi rutayobewe ubugome n’ubuhanya FPR yagiriye ababyeyi barwo, uru rubyiruko nirwo ruzamuhindukirana rumwishyuze amabi yose yagiriye abanyarwanda.
La Rédaction, Le Médiateur